IGP Wambura azindua Jengo la Ofisi ya Dawati la Jinsia na Watoto Tarime

Mkuu wa Jeshi la Polisi nchini (IGP), Camillus Wambura (katikati waliokaa), kwenye picha ya pamoja na viongozi mbalimbali mara baada ya kuzindua jengo la Ofisi ya Dawati la Jinsia na Watoto mjini Tarime leo Juni 24, 2025.

---------------------------------------------

Na Mwandishi Wetu, Tarime

Mkuu wa Jeshi la Polisi nchini (IGP), Camillus Wambura, leo Juni 24, 2025 amezindua rasmi jengo jipya la kisasa la Ofisi ya Dawati la Jinsia na Watoto mjini Tarime, Mara.

Jengo hilo limejengwa na Shirika la Umoja wa Mataifa la Idadi ya Watu (UNFPA) kupitia Mtandao wa Jinsia Tanzania (TGNP) kwa ufadhili wa Serikali ya Finland, chini ya Programu ya Chaguo Langu Haki Yangu.

IGP Wambura akikata utepe kuzindua jengo hilo.

-----------------------------------------

Katika hotuba yake, IGP Wambura amemshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kujenga mahusiano na mataifa mbalimbali, likiwemo la Finland.

“Jengo hili litakuwa kimbilio salama la wahanga wa ukatili wa kijinsia,” amesema IGP Wambura na kuwapongeza UNFPA, TGNP na Kamanda wa Mkoa wa Polisi Tarime Rorya, Mark Njera, kwa usimamizi mzuri wa ujenzi wa jengo hilo.

Aidha, ametoa wito kwa wananchi wote kupiga vita ukatili wa kijinsia ukiwemo ukeketaji, akisema “vita dhidi ya ukatili wa kijinsia siyo suala la familia pekee, bali ni la jamii nzima.”

IGP Wambura (kushoto), akikagua chumba cha mikutano ndani ya jengo hilo.

-------------------------------------------

Kwa upande wake, Kamishna wa Kamisheni ya Polisi Jamii nchini (CP), Faustine Chilogile, amesema uzinduzi wa jengo hilo umetanguliwa na elimu ya ukatili wa kijinsia na madhara yake katika kata 60 za Mkoa wa Polisi Tarime Rorya.

Naye Dkt. Majaliwa Gerald Marwa kutoka UNFPA Tanzania, amesema ujenzi wa jengo hilo la Ofisi ya Dawati la Jinsia na Watoto ni uthibitisho wa dhamira ya serikali na wadau ya kulinda watu dhidi ya vitendo vya ukatili na unyanyasaji wa kijinsia.

Awali, Mratibu wa TGNP, Flora Ndaba, amesema ujenzi wa jengo hilo umegharimu shilingi milioni 300, na kwamba jingine kama hilo limejengwa Unguja, Zanzibar.

Hafla ya uzinduzi wa jengo hilo pia imehudhuriwa na Wakuu wa Wilaya, Meja Edward Gowele (Tarime) na Dkt. Khalfan Haule (Rorya), miongoni mwa viongozi wengine wa serikali, dini na chama tawala - CCM.

Unaweza pia kusoma:

»Rais Samia aweka historia uzinduzi wa miradi mikubwa Mwanza, Simiyu »Rais aweka jiwe la msingi mradi wa kukabili mabadiliko ya tabia nchini