AICT, Right to Play walivyoadhimisha Siku ya Mtoto wa Afrika 2025 katika wilaya za Tarime, Serengeti

Wanafunzi wa Shule ya Msingi Kimusi wilayani Tarime wakipokea zawadi ya jezi za mpira kutoka AICT na Right to Play walioandaa matamasha ya michezo kwa wanafunzi wakati wa maadhimisha Siku ya Mtoto wa Afrika 2025.

------------------------------------------

Na Joseph Maunya

Kanisa la AICT Dayosisi ya Mara na Ukerewe kwa kushirikiana na shirika la kimataifa la Right to Play, wamejumuika na watoto wanaoishi katika wilaya za Serengeti na Tarime mkoani Mara, kuadhimisha Siku ya Mtoto wa Afrika - kupitia matamasha ya michezo.

Akizungumza wakati wa maadhimisho hayo yaliyofanyika wiki iliyopita katika viwanja vya Shule ya Msingi Kimusi wilayani Tarime, Mkurugenzi wa Miradi kutoka AICT Dayosisi ya Mara na Ukerewe, Charles Mashauri, aliitaka jamii kutimiza wajibu wake wa kuhakikisha watoto wanapata haki zao.

Mkurugenzi Mashauri akizungumza 

wakati wa maadhimisho hayo.

-----------------------------------------

"Leo ni maadhimisho ya Siku ya Mtoto wa Afrika, ambapo tunazungumzia haki za watoto ambazo ni kuishi vizuri, kulindwa, kuendelezwa na kushirikishwa, hasa katika maamuzi yanayowahusu. Kwa hiyo, ni wajibu wetu kama wazazi, walezi, walimu na jamii yote kuhakikisha haki hizo zinapatikana," alisema Mashauri.

Nao wazazi waliohudhuria matamasha hayo walizishukuru AICT na Right to Play kwa kuwafikishia ujumbe unaohamasisha ulinzi wa haki za watoto na kuepuka mila hatarishi dhidi ya watoto kama vile ukeketaji.

"Asanteni sana wageni wetu (AICT, Right to Play) kwa ujumbe huu, na sisi kama wazazi tumeupokea na tunaahidi kulinda haki za watoto kwa kutowakeketa, badala yake tutawapeleka shuleni wakasome," alisema Julius Mohere, mkazi wa kijiji cha Kimusi.

Sehemu ya wanafunzi walioshiriki katika maadhimisho hayo ya Siku ya Mtoto wa Afrika.

---------------------------------------

Tamasha lingine la michezo la maadhimisho hayo ya Siku ya Mtoto wa Afrika lilifanyika wilayani Serengeti kwenye viwanja vya Shule ya Msingi Morotonga, Alhamisi iliyopita, ambapo mbali na kuhusisha michezo mbalimbali, pia watoto walipatiwa zawadi kama vile jezi na vinywaji baridi.

Kwa upande wake, Afisa Mradi kutoka AICT Dayosisi ya Mara na Ukerewe, Daniel Fungo, alisema taasisi hizo zinashirikiana kuhamasisha jamii katika wilaya za Tarime na Serengeti kutoa haki sawa kwa watoto wote na kuepuka unyanyasaji na ubaguzi kwa watoto wa kike na wenye ulemavu kupitia matamasha ya michezo mashuleni.

Fungo akizungumza wakati wa maadhimisho hayo ya Siku ya Mtoto wa Afrika.

----------------------------------------

Maadhimisho ya Siku ya Mtoto wa Afrika hufanyika Juni 16 kila mwaka tangu yalipoasisiwa mwaka 1991 na uliokuwa Umoja wa Mataifa ya Afrika (OAU), ili kuenzi mamia ya wanafunzi weusi waliopoteza maisha kwa kupigwa risasi na serikali ya Makaburu huko Soweto nchini Afrika Kusini walipoandamana kudai elimu bora mwaka 1976.

Unaweza pia kusoma:

»HABARI PICHA:RC Mara awaapisha Wakuu wa Wilaya wapya wa Butiama, Serengeti »Dkt. Kamani atia nia ya ubunge tena Busega kupitia CCM »Kada wa CCM Simon Chacha arejesha fomu ya kuwania ubunge jimbo la Tarime Vijijini