Kikao cha kujadili maendeleo Mara chafana, RC Mtambi, MNEC Gachuma, Mwenyekiti Chandi waonesha njia

Kutoka kulia ni Mwenyekiti wa Bodi ya Ushauri ya Suma JKT, Meja Jenerali (Mstaafu) Michael Isamuhyo, Mbunge wa Jimbo la Musoma Mjini, Mgore Miraji, Mbunge wa Jimbo la Tarime Vijijini, Esther Matiko, Mkuu wa Wilaya ya Tarime, Meja Edward Gowele, Mkuu wa Mkoa wa Mara, Brigedia Jenerali Evans Mtambi, Mwenyekiti wa CCM Mkoa wa Mara, Patrick Chandi Marwa na MNEC Christopher Gachuma, katika picha ya pamoja mara baada ya kushiriki kikao maalum cha kujadili maendeleo ya mkoa huo kilichofanyika CMG Hotels Tarime, jana Alhamisi.

Na Christopher Gamaina
Tarime
--------------

Viongozi, wafanyabiashara na wadau wengine mbalimbali wamekutana katika Kikao Maalum cha Kujadili Maendeleo ya Mkoa wa Mara, wakijikita zaidi kubainisha fursa zilizopo na vinavyoweza kutumika kuinua uchumi kupitia uwekezaji na ajira.

Kikao hicho kilifanyika jana Alhamisi katika Hoteli ya CMG mjini Tarime chini ya uratibu wa Mwenyekiti wa Chama Cha Mapinduzi (CCM) Mkoa wa Mara, Patrick Chandi Marwa, ambapo kilifunguliwa na Mkuu wa mkoa huo, Brigedia Jenerali Evans Mtambi, aliyemwakilisha Waziri wa Ulinzi na Jeshi la Kujenga Taifa, Dkt. Rhimo Nyansaho, kama mgeni rasmi.

Wajumbe wengi walichambua fursa zilizopo kwenye sekta za kilimo, madini, utalii, uvuvi, biashara na ushirika, pamoja na umuhimu wa kuimarisha matumizi ya rasilimali hizo ili ziwe chachu ya ukuaji wa uchumi na uboreshaji wa maisha ya wana-Mara.

Wachangiaji wakuu walikuwa Brigedia Jenerali Mtambi, mfanyabiashara maarufu na Mjumbe wa Halmashauri Kuu ya Taifa ya CCM, Christopher Mwita Gachuma, Mkurugenzi wa Kemanyanki Contractors, Nicolaus Mgaya "Chichake", Mbunge wa Jimbo la Tarime Mjini, Esther Matiko na Mbunge wa Jimbo la Tarime Vijijini, Mwita Waitara, miongoni mwa wadau wengine.

Katika hotuba yake ya ufunguzi, Mkuu wa Mkoa, Brigedia Jenerali Mtambi, alimpongeza Mwenyekiti Chandi na kamati yake ya maandalizi yaliyofanikisha kikao hicho.

Mkurugenzi wa Mara Online, Jacob Mugini akitambulisha wajumbe kikaoni

Kuhusu uchechemuzi wa maendeleo, Brigedia Jenerali Mtambi alisema sekta binafsi ina nafasi kubwa katika kuchochea ukuaji wa uchumi kupitia uwekezaji kwenye miradi mbalimbali.

Hivyo, aliwahimiza watu wenye uwezo wa kiuchumi kuchangamkia uwekezaji katika sekta muhimu zilizopo kama vile kilimo, madini, utalii, uvuvi na ufugaji, ili pia kupanua wigo wa ajira na kuchangia maendeleo na ustawi wa wana-Mara.

Brigedia Jenerali Mtambi akizungumza katika kikao hicho

“Ninatoa wito hata kwa wana-Mara waliopo nje ya Mara waje kuwekeza huku ili ndugu zao wapate ajira, kuinua uchumi na kuleta maendeleo endelevu katika mkoa huu,” alisema Brigedia Jenerali Mtambi.

Sehemu ya wajumbe wakifuatilia mada kikaoni

Naye MNEC Gachuma alimpongeza Mwenyekiti Chandi kwa kubuni wazo la kikao hicho, akisema ni hatua muhimu katika kuhamasisha wana-Mara kushiriki kikamilifu kuchochea maendeleo ya mkoa wao.

MNEC Gachuma akisisitiza jambo katika kikao hicho

“Wazo hili ni jambo jema sana, Mwenyekiti [Chandi] umefanya jambo la maana sana. Maendeleo yanaletwa na wenye eneo wenyewe. Mara itajengwa na wana-Mara wenyewe,” alisema Gachuma.

Sehemu nyingine ya wajumbe wakifuatilia mada kikaoni

Kwa upande wake Mkurugenzi wa Kampuni ya Kitalii ya Nyamoyo Adventure kutoka wilayani Serengeti, Baraka Thobias, alitaja vivutio vikubwa vya utalii vilivyopo Mara vyenye fursa za uwekezaji kuwa ni pamoja na Hifadhi ya Taifa Serengeti, Mto Mara, Ziwa Victoria na Makumbusho ya Mwalimu Julius K. Nyerere - Butiama.

Baraka akiwasilisha mada katika kikao hicho

Mkurugenzi wa Kemanyanki Contractors, Chichake, yeye alitoa wito kwa wafanyabiashara wa ndani kuchangamkia fursa za kusambaza bidhaa na huduma mbalimbali zilizopo katika Mgodi wa Dhahabu wa North Mara.

“Wana-Mara waliofanikiwa kiuchumi wasaidie kuelekeza wengine namna walivyofanya hadi kufanikiwa ili nao wajifunze na kuhamasika kuchangamkia fursa zilizopo,” alisema Chichake.

Chichake akichangia mada katika kikao hicho

Mbunge Waitara yeye alitoa wito kwa wana-Mara yenye nyadhifa za juu kwenye utumishi wa umma kujitokeza kutoa michango ya hali na mali ili kusukuma maendeleo ya kisekta katika mkoa huo.

Mbunge Waitara akichangia mada kikaoni

Kwa upande wake Mbunge Esther Matiko pamoja na mambo mengine, alishauri mkoa uwe na database (hifadhidata) ya vijawa wake na viwango vyao vya elimu na taaluma ili fursa zinapotokea iwe rahisi kujua wanaostahili kupewa.

Mbunge Esther Matiko akizungumza kikaoni

Katika kuhitimisha kikao hicho, Mwenyekiti Chandi na Mkuu wa Mkoa, Brigedia Jenerali Mtambi, waliwahakikishia wajumbe kuwa kikao hicho ni mwanzo wa vikao endelevu vya kujadili maendeleo ya mkoa huo.

“Kiako hiki ni mwanzo wa vikao vya aina hii vingi vijavyo,” alisisitiza Chandi.