Ngekewa yamshukia mchimbaji mdogo, ageuka bilionea

Na Mwandishi Wetu

Wahenga waliposema kwamba unaweza kulala maskini kesho yake ukaamka tajiri hawakuelezea dhana isiyo na ukweli ndani yake. Uthibitisho wa usemi huo ni bahati iliyomkuta mchimbaji mdogo wa dhahabu wilayani Chunya, mkoani Mbeya, Aidan Msigwa, aliyeshukiwa na ngekewa ya kupata shilingi bilioni 20 bila kutarajia kwa mauzo yake ya madini hayo.

Hapo Septemba 17 mwaka huu 2024 Msigwa hakujua kwamba ataingia kwenye orodha ya mabilionea alipokwenda Soko la Madini la Chunya kuuza dhahabu yake kilo 111.82 na kujipatia shilingi bilioni 20.1.

Msigwa ni mchimbaji mdogo anayemiliki leseni za uchimbaji na utafutaji madini katika maeneo tofauti wilayani Chunya. Pia anamiliki mtambo wa uchenjuaji wa madini hayo.

Afisa Madini Mkazi wa Mkoa wa Kimadini wa Chunya, Laurent Mayalla, amesema kupitia mauzo ya madini hayo serikali imejipatia kiasi cha shilingi bilioni 1.2 ikiwa ni mrahaba, shilingi milioni 201 ada ya ukaguzi na shilingi 60.34 malipo ya ushuru wa huduma ya Halmashauri na shilingi 402.31 malipo ya kodi ya zuio kwa Mamlaka ya Mapato Tanzania.

“Kitendo alichokifanya Msigwa ni cha kizalendo kutokana na ushirikiano alioutoa kuanzia uchimbaji hadi uzalishaji wa dhahabu hiyo. Ni kitendo kinachopaswa kuigwa na wachimbaji wote katika kudhibiti utoroshaji madini,”amesema Mayalla.

Soko la Madini la Chunya ni la pili kuanzishwa nchini hapo Mei 2019 baada ya Soko Kuu la Madini la Geita lililoanzishwa Machi 2019.

Hadi sasa yapo masoko 43 ya madini nchi nzima na vituo vidogo vya ununuzi wa madini 105. Mkoa wa Madini wa Chunya unashika nafasi ya pili kwa uzalishaji wa dhahabu kwa wachimbaji wadogo.

UNAWEZA PIA KUSOMA:

>>TANAPA inavyotoa kipaumbele uboreshaji wa miundombinu ya barabara Hifadhi ya Serengeti >>Polisi Tarime-Rorya wajiweka tayari dhidi ya uhalifu >>Yanga yainyuka CBE 6-0, yatinga hatua ya makundi Ligi ya Mabingwa Afrika