Kila la heri Kanali Surumbu wilayani Mbarali, Tarime wana matarajio makubwa kwa Meja Gowele

Kanali Maulid Hassan Surumbu

------------------------------------------

NA CHRISTOPHER GAMAINA
chrisgapressman@gmail.com
-----------------------------------------

Wiki iliyopita, Rais wa Jamhuri ya Muungano wa Tanzania, Dkt Samia Suluhu Hassan alimhamisha Mkuu wa Wilaya ya Tarime mkoani Mara, Kanali Maulid Hassan Surumbu kwenda wilaya ya Mbarali mkoani Mbeya.

Katika kipindi cha miezi kadhaa aliyohudumu Tarime, tumeshuhudia kupungua kwa matukio ya uhalifu na kuimarika kwa hali ya usalama na amani, na hivyo kuweka mazingira bora ya shughuli za maendeleo ya wananchi.

Alishirikiana na wadau wa maendeleo kuhakikisha kwamba miradi ya kijamii inatekelezwa kwa ufanisi, uwazi na uaminifu. Hii imemdhihirisha Kanali Surumbu kuwa ni mfano wa kuigwa kwa uongozi wa kuboresha maisha ya watu kwa njia inayokubalika.

Kanali Surumbu anaelezwa na watu wengi wa kada mbalimbali wilayani Tarime kuwa ni kiongozi wa kipekee, msikivu na mfuatiliaji wa changamoto za wananchi na kuzitafutia ufumbuzi kwa haraka, lakini pia ni mpenda watu, asiyekuwa na makuu.

Ni matumaini yetu kwamba, kwa kuhamishiwa wilaya ya Mbarali, Kanali Surumbu ataendelea na juhudi zake zinazolenga kuboresha huduma za kijamii, usimamizi mzuri wa rasilimali na kuimarisha usalama wa wananchi.

Wilaya ya Mbarali itarajie kushuhudia maendeleo makubwa chini ya uongozi wake. Uzoefu wa uongozi na uwezo wake wa kushughulikia changamoto vitamsaidia Kanali Surumbu kukabiliana na mazingira mapya na kuchochea maendeleo ya wananchi.

Tunamtakia Kanali Surumbu kila la heri katika majukumu yake mapya wilayani Mbarali, tukiamini kwamba atajitahidi kwa bidii na maarifa yake yote kuhakikisha wilaya hiyo inapata maendeleo ya kweli kama alivyofanya wilayani Tarime.

Matarajio ya wana-Tarime
kwa Meja Edward Gowele

Kwa kuhamishwa kwa Kanali Surumbu, wana-Tarime wanamkaribisha Mkuu mpya wa Wilaya, Meja Edward Flowin Gowele akitokea wilaya ya Rufiji mkoani Pwani. Huyu ni kiongozi mwenye uzoefu mkubwa katika utumishi wa umma.

Meja Edward Flowin Gowele

---------------------------------------

Tuna matumaini kwamba Meja Gowele ataendeleza mikakati ya kuboresha huduma za kijamii na kiuchumi na kuongeza ushirikiano kati ya serikali na wananchi wilayani Tarime.

Lakini pia, ataendeleza na kuboresha mipango ya maendeleo ya wilaya ya Tarime ikiwemo usalama, elimu na afya, lakini pia kuongeza ushirikiano na sekta binafsi ili kuchochea ukuaji wa kiuchumi kama alivyofanya mtangulizi wake, Kanali Surumbu.

Moja ya majukumu muhimu yaliyo mbele ya Meja Gowele ni kuimarisha ushirikiano wa kijamii. Ushirikiano wake na viongozi wa jamii na mashirika ya kiraia utawezesha maoni na mahitaji ya wananchi kuzingatiwa katika utatuzi wa changamoto na mipango ya maendeleo ya wananchi.

Wilaya ya Tarime ina rasilimali na fursa nyingi zikiwemo za kilimo na madini. Meja Gowele ana jukumu la kukuza sekta hizo kwa kuweka mikakati ya kuboresha uzalishaji na uuzaji wa mazao.

Aidha, ana jukumu la kuhakikisha kuwa wawekezaji wanapata fursa za kuwekeza katika sekta hizo na nyinginezo ili kuchochea ongezeko la ajira na maendeleo ya uchumi.

Kama ilivyokuwa chini ya uongozi wa Kanali Surumbu, Meja Gowele anatarajiwa pia kuendeleza juhudi za kuimarisha ushirikiano na vyombo vya sheria na usalama ili kuhakikisha wilaya ya Tarime inabaki kuwa sehemu salama kwa shughuli za kibiashara na maisha ya watu ya kila siku.

Huduma za afya ni muhimu kwa maendeleo ya jamii. Meja Gowele anatarajiwa kuendeleza mipango ya kuboresha huduma za afya, kuongeza upatikanaji wa dawa katika hospitali, zahanati na vituo vya afya vya serikali na kuhakikisha vinaendeshwa kwa ufanisi.

Sekta ya elimu itakuwa sehemu nyingine muhimu inayohitaji msukumo wa Meja Gowele ili kuhakikisha kwamba shule zinaendeshwa kwa viwango vya hali ya juu, kuongeza idadi ya walimu na kuboresha mazingira ya kujifunzia kwa wanafunzi.

Pia, ni muhimu kwa Meja Gowele kuweka mikakati madhubuti ya kuhakikisha kwamba rasilimali zilizopo wilayani Tarime zinatumika kwa ufanisi na miradi ya maendeleo inaendeshwa kwa uwazi na usawa.

Kuongeza ushirikiano na sekta binafsi ni muhimu kwa maendeleo ya kiuchumi. Meja Gowele anatarajiwa kuwa na mkakati wa kuhamasisha wawekezaji na wajasiriamali kushirikiana na serikali ili kufanikisha miradi ya maendeleo na kukuza uchumi wa wilaya.

Vile vile, anatarajiwa kuwa na mipango mikakati ya kuhamasisha shughuli za kijamii na miradi inayolenga kuboresha maisha ya wananchi. Kuwekeza katika miradi ya kijamii kutaleta mabadiliko chanya katika maisha ya watu.

Mazingira ni sehemu muhimu kwa maendeleo endelevu. Meja Gowele anatarajiwa kusimamia pia mazingira kwa kuhakikisha kwamba shughuli za maendeleo zinazingatia utunzaji wa mazingira na kuzuia uharibifu wa mazingira.

Kufuatilia na kutathmini maendeleo ya miradi ni muhimu pia ili kuhakikisha malengo yaliyowekwa yanatimia. Meja Gowele anatarajiwa kuweka mifumo bora ya ufuatiliaji na tathmini ili kubaini changamoto na kuzitafutia ufumbuzi kwa wakati.

Inatarajiwa pia kwamba huduma bora kwa wananchi zitakuwa kipaumbele cha Meja Gowele. Atahitaji kuhakikisha kwamba huduma zinazotolewa zinakidhi mahitaji ya wananchi na malalamiko yanashughulikiwa kwa wakati pia.

Kwa kumalizia, tunamtakia Kanali Surumbu kila la heri katika majukumu yake mapya wilayani Mbarali. Na kwa upande mwingine, tunamkaribisha Meja Gowele aweze kushirikiana na wananchi kuchochea maendeleo ya wilaya ya Tarime.

Tunaamini kwamba mabadiliko hayo ya uongozi yaliyofanywa na Rais Samia yataleta maendeleo mapya na kuimarisha hali ya maisha kwa wananchi wa wilaya za Tarime na Mbarali.