Fahamu mambo matano ya kipekee kuhusu Papa mpya Leo XIV

Kiongozi mpya wa Kanisa Katoliki Duniani, Papa Leo XIV.

Kuchaguliwa kwa Kardinali Robert Francis Prevost kuwa Papa Leo XIV kumeweka historia mpya ndani ya Kanisa Katoliki.

Akiwa Papa wa kwanza kutoka Marekani, yeye ni kiongozi anayetajwa kuwa na mwelekeo wa kuendeleza mageuzi ya hayati Papa Francis, huku akisisitiza huduma kwa maskini na makundi yaliyo pembezoni.

Papa Leo XIV mwenye umri wa miaka 69, anakuwa kiongozi wa 267 wa kanisa hilo akichukua nafasi ya Papa Francis aliyefariki dunia mwezi uliopita. Uchaguzi wake unahitimisha minongo'ono ya nani kuwa Papa iliyodumu kwa majuma kadhaa.

Hapa tunakuletea mambo matano ya kipekee kuhusu maisha na utume wa Papa huyu mpya:

1. Jina la Kipapa: Leo XIV

Papa mpya Leo XIV (kulia), akisalimiana na Papa Francis aliyefariki dunia mwezi uliopita. Aliheshimika na kuaminika na Papa Francis.

----------------------------------------

Uamuzi wa kuchukua jina "Leo XIV" si wa kawaida. Papa wa mwisho kutumia jina hilo alikuwa Papa Leo XIII aliyeliongoza Kanisa kati ya mwaka 1878 hadi 1903. Alijulikana kwa msimamo wake thabiti kuhusu haki za wafanyakazi na mafundisho ya kijamii ya Kanisa Katoliki.

Kwa kuchukua jina hili, Papa mpya Leo XIV anatoa ujumbe mzito kuhusu mwelekeo wa utawala wake; kusimama upande wa maskini, wanyonge na kupaza sauti za wale wasiosikika. Ni ishara ya kwamba atakuwa kiongozi mwenye msimamo katika haki za kijamii, kama alivyokuwa mtangulizi wake wa jina hilo.

Katika hotuba yake ya kwanza, alirejelea kauli ya Mtakatifu Augustino: "Kwa ajili yenu mimi ni Askofu, lakini pamoja nanyi mimi ni Mkristo," akisisitiza uongozi wa pamoja na unyenyekevu.

2. Shabiki wa mchezo wa Tenisi

Tofauti na picha ya kawaida ya viongozi wa Kanisa, Papa Leo XIV anajulikana kwa upendo wake kwa mchezo wa tenisi. Alisema: "Ninajiona kama mcheza tenisi wa kujifurahisha kabisa."

Aliongeza kuwa tangu aondoke Peru amekuwa na nafasi chache za kucheza, lakini anatazamia kurudi uwanjani. Mbali na tenisi, anapenda kusoma vitabu, kutembea kwa miguu na kusafiri kwenda maeneo mapya yenye tamaduni tofauti.

Mwenendo huu wa maisha ya kawaida unamweka karibu zaidi na waumini wa kawaida, akionesha kuwa hata kiongozi wa juu wa Kanisa ni mtu wa watu.

3. Raia wa Marekani na Peru

Ingawa alizaliwa Chicago, Marekani, Papa Leo XIV pia ni raia wa Peru, ambako aliishi na kufanya kazi kwa miaka mingi akiwa kama mmisionari na baadaye askofu wa Chiclayo.

"Kuwa na Papa kutoka Marekani ni heshima kubwa," Rais wa Marekani, Donald Trump alisema, alipoulizwa maoni yake kuhusu kutangazwa kwakwe.

Papa Leo XIV, mwenye umri wa miaka 69, alizaliwa Chicago na alisoma chuo kikuu nje ya Philadelphia, kabla ya kuwa mmisionari nchini Peru.

Alipata uraia wa Peru mwaka 2015, jambo linalomfanya kuwa na uhusiano wa kipekee na Amerika Kusini. Uraia huu wa nchi mbili ni mfano wa sura ya "Papa wa dunia nzima" anayeelewa na kugusa tamaduni tofauti.

Rais wa Peru, Dina Boluarte, aliuita uchaguzi wake kuwa "tukio la kihistoria kwa Peru na dunia."

4. Mbobezi wa lugha na utamaduni wa kimataifa

Moja ya sifa kubwa za Papa Leo XIV ni uwezo wake wa lugha. Anaongea Kihispania na Kiitaliano kwa ufasaha, jambo alilothibitisha alipowahutubia maelfu ya waumini katika Uwanja wa Mtakatifu Petro.

Aliishi na kuhudumu Peru kwa zaidi ya miaka kumi, akijenga uhusiano wa karibu na jamii za huko. Ndani ya Vatican alijulikana kama "Mmarekani asiye wa Kimarekani sana," kutokana na maisha yake ya kimataifa na mtazamo mpana wa kiutume.

Uwezo huu wa lugha na uelewa wa tamaduni mbalimbali ni rasilimali kubwa kwa kanisa linalojitanua kote ulimwenguni.

Uongozi wa kidiplomasia na mtazamo wa kati
Papa Leo XIV mara baada ya kutangazwa kama Papa mpya.

Papa Leo XIV anatajwa kuwa kiongozi mwenye msimamo wa kati anayejumuisha pande zote za kanisa. Anaelekea kuwa na mtazamo wa maendeleo kwenye masuala ya kijamii kama uhamiaji na umasikini, lakini anadumisha msimamo wa wastani kwenye masuala ya maadili ya Katoliki.

Aliwahi kuwa kiongozi wa Shirika la Mtakatifu Augustino kwa zaidi ya muongo mmoja na hivi karibuni alikuwa mkuu wa idara ya Vatican inayosimamia uteuzi wa maaskofu kote duniani, nafasi yenye ushawishi mkubwa.

Mtazamo huu wa kupatanisha na uongozi wa busara unampa uwezo wa kuwaunganisha waumini wa pande zote za dunia, akiwa kama daraja kati ya makundi yenye mitazamo tofauti ndani ya Kanisa.

Kupitia maisha yake ya kimataifa, unyenyekevu wa kiutume, na msimamo wa kijamii, Papa Leo XIV anawakilisha sura mpya ya Kanisa Katoliki lenye mizizi, lakini pia lenye maono ya kimataifa. Ni Papa anayeelewa ulimwengu wa sasa na aliye tayari kutumikia kwa moyo wote.

Chanzo: BBC