Rais wa Uganda, Yoweri Museveni (katikati pichani), mwenye umri wa miaka 81, ameapishwa kwa muhula wa saba mfululizo baada ya ushindi wake mkubwa katika uchaguzi uliofanyika Januari 2026, na kuongeza muda wake kama mmoja wa watawala waliohudumu kwa muda mrefu zaidi barani Afrika.
Ulinzi mkali, ikiwa ni pamoja na vifaru vya kivita uliwekwa katika mji mkuu, Kampala, kabla ya kuapishwa kwake leo Mei 12, 2026, katika kile polisi walisema ni hatua zinazolenga kudumisha utulivu wa umma.
Museveni alitangazwa mshindi wa uchaguzi huo kwa asilimia zaidi ya 70 ya kura zote, huku muhula wake ukitarajiwa kuisha mwaka wa 2031.
Mpinzani wake mkuu, nyota wa pop aliyegeuka kuwa mwanasiasa, Bobi Wine, alikataa matokeo akisema upigaji kura ulikumbwa na "udanganyifu". Hata hivyo, maafisa wa uchaguzi walikanusha madai hayo.
Kiongozi huyo wa upinzani mwenye umri wa miaka 44, ambaye jina lake halisi ni Robert Kyagulanyi Ssentamu, alikimbia nchi baada ya uchaguzi, akisema anaogopa kwamba "utawala ulitaka kuniangamiza".
Museveni aliingia madarakani kwa mara ya kwanza kama kiongozi wa waasi mwaka 1986, lakini tangu wakati huo ameshinda chaguzi saba.
Yeye ni miongoni mwa viongozi wachache wa Afrika walio madarakani kwa miaka zaidi ya 40. Wengine ni pamoja na Denis Sassou Nguesso wa Congo-Brazzaville, Teodoro Obiang wa Equatorial Guinea na Paul Biya wa Cameroon.
Sherehe ya kuapishwa kwa Rais Museveni ilifanyika katika viwanja vya Uhuru vya Kololo jijini Kampala. Serikali ilitangaza siku hiyo kuwa sikukuu ya umma.
No comments:
Post a Comment