DC Tarime afunga mafunzo ya mamia ya waendesha bodaboda yaliyofadhiliwa na Professor Mwera Foundation

Mkuu wa Wilaya ya Tarime, Meja Edward Gowele (kulia), akikabidhi vyeti kwa waendesha bodaboda waliohitimu mafunzo maalum katika Chuo cha Mafunzo ya Ufundi Tarime (TVTC) jana.

Na Godfrey Marwa
Tarime
----------

Mkuu wa Wilaya (DC) ya Tarime, Meja Edward Gowele, amefunga mafunzo maalum ya waendesha pikipiki za abiria “bodaboda” zaidi ya 900 yaliyofadhiliwa na Taasisi ya Professor Mwera (PMF).

Mafunzo hayo yalifanyika kwa siku tano katika Chuo cha Mafunzo ya Ufundi cha Tarime (TVTC) kinachomilikiwa na taasisi hiyo.

Waendesha bodaboda waliosajiliwa kupata mafunzo hayo walikuwa 942, kati ya hao, waliofanya mtihani wa kuhitimu wa kimaandishi ni 580, wengine 362 walishiriki mafunzo kwa vitendo pekee kutokana na kutojua kusoma na kuandika.

Sehemu ya waendesha bodaboda waliohitimu mafunzo hayo

Mafunzo hayo ambayo yalizinduliwa na Mkuu wa Usalama Barabarani wa Mkoa (RTO) wa Tarime Rorya, SP Hamis Wembo, yamewajengea bodaboda hao uwezo kufanya kazi zao kwa weledi na kwa kuzingatia sheria za usalama wa barabarani.

Akizungumza katika hafla ya kufunga mafunzo hayo na kuwakabiti wahitimu vyeti chuoni hapo jana Novemba 28, 2025, DC Gowele aliwapongeza kwa hatua hiyo na kuahidi kuwapa ofisi katika moja ya majengo ya serikali ndani ya Halmashauri ya Mji wa Tarime.

DC Gowele akiendelea kukabidhi vyeti kwa wahitimu

"Niwapongeze… mzingatie mlichofundishwa, usalama wa abiria mliowabeba unategemea weledi wenu. Mhe. Rais Samia Suluhu Hassan ameunda wizara kwa ajili ya vijana na ataelekeza fedha nyingi kuwainua. Ninyi ni kundi mhimu ndiyo maana nimetoa jengo la serikali la kufanyia shughuli zenu.

"Msikubali kutumika vibaya - hamtafanya shughuli kwa usalama, tuepuke dawa za kulevya zinaharibu nguvu kazi ya taifa, tuepuke vilevi wakati wa kazi zetu. Ukizingatia mliyofundishwa huwezi kupata vifo visivyo la lazima,” alisema DC Gowele.

Kwa upande wake Mkurugenzi wa PMF, Hezbon Peter Mwera, pamoja na mambo mengine, alitumia nafasi hiyo kutagaza ofa ya elimu kwa watoto wa bodaboda na wao wenyewe watakaohitaji kusoma fani ningine za ufundi chuoni hapo.

Mkurugenzi wa PMF, Hezbon Peter Mwera (kulia), akipokea zawadi kutoka kwa waendesha bodaboda waliohitimu mafunzo hayo.

"Bodaboda ni wadau, nimewapa ofa ya kusomesha watoto wao shule ya msingi kwa gharama ya shilingi laki tatu, badala ya laki saba kwa mwaka. Tarime itajengwa na wana-Tarime, siyo wengine.

"Asilimia 90 hawakuwa na leseni, Mhe. DC ningeomba muone namna ya kuwasaidia hawa vijana kupata leseni. Pia, tunaomba mkaisemee vizuri Taasisi ya PMF, muendelee kuwa mawakala wazuri wa taasisi hii," alisema Hezbon.

Bodaboda waliohitimu mafunzo hayo waliishukuru Taasisi ya PMF kwa kufadhili mafunzo hayo wakisema yatawasaidia kujua alama, sheria na taratibu za usalama barabarani.

DC Gowele katika picha ya pamoja na Maafisa wa Polisi, Mkurugenzi Hezbon na viongozi wa waendesha bodaboda wa Halmashauri ya Mji wa Tarime.

Chuo cha Mafunzo ya Ufundi Tarime (TVTC) kinafundisha fani mbalimbali zikiwemo za ufundi magari, umeme, mabomba, uhazili, udereva, ushonaji, uongozaji watalii na upishi, miongoni mwa nyingine.

Mbali na chuo hicho cha ufundi, taasisi ya PMF inamiliki pia Shule ya Msingi Mwera Vision, Shule ya Sekondari Tarime Mchanganyiko, Jogging Club, Mwera Jazz Band, PMF Restaurant.