Wananchi Tarime watahadharishwa kutojiingiza kwenye mkumbo wa maandamano

Mkuu wa Wilaya ya Tarime, Meja Edward Gowele.

Na Mwandishi Wetu
Tarime
-----------

Serikali imewatahadharisha wananchi wilayani Tarime kutoingia kwenye mkumbo wa maandamano kuelekea na Desemba 9, 2025.

Mkuu wa Wilaya (DC) ya Tarime, Meja Edward Gowele, ametoa tahadhari hiyo wakati akizungumza na waandishi wa habari ofisini kwake leo Novemba 29, 2025.

"Nitoe tahadhari tusikubali kurudia kwenye tatizo ambalo lilitokea Oktoba 29, 2025, zipo taarifa zinazoenea za kuanza maandamano kuanzia Desemba 1 hadi 9,” amesema DC Gowele na kuendelea:

"Kila mmoja ajiepushe kwa sababu hayo wanayoita maandamano ya Desemba 9 siyo maandamano - bado kuna kikundi ambacho kinahamasisha jamii ya wana-Tarime, vijana, watoto na watu wazima kuingia kwenye hayo wanayoyaita maandamano.

"Tumeshajiridhisha kwamba taarifa hizo hazina mashaka, lengo lao kubwa ni kufanya uharibifu na uporaji mkubwa. Asijitokeze mtu kwenda kuungana na hilo kundi kwa lengo la kuharibu usalama wetu - hatutamfumbia macho, tutachukua hatua stahiki. Mzuie mtoto wako, ndugu yako, zuia vijana marafiki na jirani zako.”

Aidha, DC Gowele amewataka wafanyabiashara ya tairi chakavu na bidhaa zitokanazo na tairi hizo kuwa na chumba maalum imara cha kuyahifadhi ili yasije kutumiwa kuleta madhara.

Pia, amewakumbusha wauzaji wa mitungi ya gesi kufuata maelekezo kwa kuihifadhi ndani, badala ya kuiweka nje ili kuepusha madhara yasiyo ya lazima.