Kushuka Matokea Darasa la Saba 2025 Mara: Prof Muhongo atoa ushauri wa nini kifanyike

Mbunge wa Jimbo la Musoma Vijijini , Prof Sospeter Muhongo

Na Mwandishi Wetu, Musoma

Mbunge wa Jimbo la Musoma Vijijini, Prof Sospeter Muhongo, ametoa wito kwa Halmashauri za Wilaya za mkoa wa Mara kujadili namna ya kuboresha kiwango cha elimu mkoani humo kufuatia matokeo mabaya ya Darasa la Saba mwaka huu.

Mkoa wa Mara umeshika nafasi ya mwisho kati ya mikoa yote 26 ya Tanzania Bara kwa matokeo ya Darasa la Saba 2025.

Hali hiyo imemfanya Prof Muhongo kujiuliza maswali mengi yasiyo na majibu ya haraka, zaidi ya kuwashauri viongozi wa kila Halmashauri kutafakari kwa kina mwenendo huo ili kuukwamua mkoa na ufaulu hafifu wa wanafunzi.

"Sisi wote tuungane pamoja kuboresha elimu mkoani mwetu, amesema Prof. Muhongo katika taarifa yake aliyoitoa Novemba 27, 2025 kuelezea kushuka kiwango cha ufaulu mkoani humo.

Amesema zoezi la kujadili hali ya elimu mkoani humo ni pana linalohitaji kuanzia ngazi ya familia, kaya hadi mkoa ili kubaini kiini cha tatizo la kuporomoka kiwango cha elimu.

Kwa mujibu wa matokeo ya mtihani wa kitaifa ya Darasa la VII 2025, mkoa wa Dar es Salaam ndiyo unaoongoza kwa asilimia 94.63 ya ufaulu ikilinganishwa na asilimia 66.51 ya mkoa wa Mara ulioshika nafasi ya mwisho kitaifa.

Mwaka 2020 , Prof Muhongo alimshauri Mkuu wa Mkoa wa wakati huo, Adam Malima, kuitisha mkutano kujadili matokeo mabaya ya ufaulu kwa wanafunzi wa Darasa la Saba na Kidato cha Nne.

Mjadala huo ulizaa matunda baada ya kuonyesha dalili za kupanda kwa ufaulu ingawa kwa sasa hali imeanza kushuka.

Inatazamiwa kwamba viongozi wa mkoa wa Mara sasa watalivalia njuga suala hilo ili kuunusuru mkoa wao dhidi ya mporomoko wa matokeo ya ufaulu.