CSR Barrick North Mara yachochea maendeleo ya kijamii Matongo

February 06, 2026 ,HABARI

Mwenyekiti wa Serikali ya Kijiji cha Matongo, Charles Ryoba.

Na Mwandishi Wetu
Tarime
-------------

Kijiji cha Matongo wilayani Tarime kinaendelea kushuhudia utekelezaji wa miradi mipya ya maendeleo kutokana na fedha zinazotolewa na Mgodi wa Dhahabu wa Barrick North Mara kupitia mpango wake wa Uwajibikaji kwa Jamii (CSR).

Akizungumza na Sauti ya Mara hivi karibuni, Mwenyekiti wa Serikali ya Kijiji hicho, Charles Ryoba, alisema miradi inayotekelezwa kwa sasa imejikita katika kuboresha sekta ya elimu na miundombinu ya usafiri.

“Kwa sasa tunatekeleza miradi ya ujenzi wa miundombinu ya shule na barabara kutokana na fedha za CSR kutoka Mgodi wa Barrick North Mara,” alisema Ryoba.

Alifafanua kuwa miradi hiyo inahusisha ujenzi wa vyumba viwili vya madarasa, jengo la utawala katika Shule ya Sekondari Matongo na nyumba ya Mwalimu Mkuu wa Shule ya Msingi Matongo.

Ujenzi wa vyumba viwili vya madarasa katika Shule ya Sekondari Matongo unaelekea kukamilishwa

Kwa mujibu wa Mwenyekiti Ryoba, ujenzi wa vyumba hivyo vya madarasa umetengewa shilingi milioni 64, jengo la utawala shilingi milioni 172, huku nyumba ya Mwalimu Mkuu ikigharimu shilingi milioni 85.

“Fedha zote hizo zimetolewa na mgodi kupitia mpango wa CSR, jambo ambalo limekuwa msaada mkubwa kwa kijiji chetu,” alisisitiza.

Ujenzi wa jengo la utawala katika Shule ya Sekondari Matongo unaendelea

Sehemu ya mbele ya jengo la nyumba ya Mwalimu Mkuu katika Shule ya Msingi Matongo

Aidha, Ryoba alisema wana mpango wa kutekeleza mradi wa uzibuaji wa barabara yenye urefu wa kilomita 2.2, ambao utaboresha usafiri na kurahisisha shughuli za kijamii na kiuchumi kwa wakazi wa kijiji hicho.

Mgodi wa Dhahabu wa Barrick North Mara unaendeshwa na Kampuni ya Barrick kwa ubia na Serikali ya Tanzania kupitia Kampuni ya Twiga Minerals.

Mpaka sasa, mgodi huo umetumia shilingi bilioni 26.86 kugharimia utekelezaji wa miradi ya CSR 255 katika sekta mbalimbali, ikiwemo elimu ya msingi na sekondari, afya, barabara, maji, miradi ya kiuchumi na mazingira - tangu mwaka 2019 ulipokabidhiwa kwa Kampuni ya Barrick.

Chanzo: Gazeti la Sauti ya Mara

No comments:

Post a Comment

About Mara Online News:

Established in 2019, Mara Online is the leading digital media in Mara region bordering Lake Victoria, Africa’s largest freshwater landmass. You can always count on Mara Online for factual, honest journalism without spin. Our coverage is deep and extensive. What makes you truly love Mara Online stories those from its sister Kiswahili-language tabloid, Sauti ya Mara, is our talks on such key topics as water, health, education, conservation, mining, tourism, agriculture, fishing, livestock development, investments, and infrastructure development, just to mention a few. Indeed, through reading Mara Online stories and those from Sauti ya Mara newspaper, you will find yourself indulging in fascinating read of stories you have been longing for in your daily life. Our focus is to transform local communities and engage them in the main development process of the country.