Mfanyabiashara Mtanzania Nyambari Nyangwine (aliyevaa kofia) na wasaidizi wake katika picha ya pamoja na wawekezaji wa nchini Uturuki, jijini Konya hivi karibuni.
--------------------------------
Historia ya maendeleo ya mataifa mengi inaonesha kuwa mapinduzi ya kiuchumi hayakutegemea juhudi za serikali pekee, bali pia mchango wa sekta na watu binafsi wenye maono makubwa waliothubutu kuvuka mipaka ya nchi zao kutafuta masoko, maarifa, washirika na mitaji kwa ajili ya kuchangia mageuzi ya kiuchumi katika mataifa yao.
Hata Tanzania wapo wananchi wazalendo ambao wameamua kutumia uwezo, maarifa na rasilimali zao kuitangaza nchi hii katika medani za kimataifa, wakiamini kuwa maendeleo ya mtu binafsi yana maana zaidi pale yanapogeuka kuwa maendeleo ya taifa.
Miongoni mwa watu hao ni mfanyabiashara, mwandishi na mchapishaji wa vitabu maarufu nchini Tanzania, Nyambari Nyangwine, ambaye ameendelea kujijengea heshima kwa kujitolea kutekeleza kwa vitendo dhana ya diplomasia ya uchumi kuitangaza Tanzania kimataifa.
Katika miaka ya karibuni, Nyambari ameonesha mfano wa uzalendo unaostahili kuigwa kwa kuendelea kufanya ziara za kibiashara katika mataifa mbalimbali duniani kama vile India, China, Falme za Kiarabu, Uturuki, Brazil na Uganda, kwa kutaja machache.
Ziara hizo za Nyambari zimekuwa zaidi ya safari za kutafuta fursa za kibiashara kwani zimekuwa sehemu ya kuitangaza Tanzania kama nchi yenye mazingira bora ya uwekezaji, utalii na ushirikiano wa kimataifa.
Hatua yake ya kufanya ziara za kukutana na kufanya mazungumzo na wafanyabiashara wakubwa na wadau wa maendeleo huko ughaibuni inadhihirisha kuwa Watanzania binafsi wanaweza kuwa mabalozi wa maendeleo ya nchi yao.
Mazungumzo hayo yamekuwa yakilenga kujenga ushirikiano katika uwekezaji wa viwanda, maendeleo ya elimu, kilimo, afya na utalii - sekta ambazo ni nguzo muhimu za uchumi endelevu na shindani.
Nyambari Nyangwine na mtoto wake, Benson, wakiwa ziarani nje ya Tanzania.
Kinachovutia zaidi, safari za Nyambari za ughaibuni zimekuwa sio za kutafuta manufaa yake binafsi pekee, bali pia amekuwa akitumia fursa hiyo kuwa sehemu ya kuitangaza Tanzania kama kitovu cha fursa za uwekezaji.
Kila fursa anayopata mbele ya wawekezaji na wafanyabiashara wa kimataifa, amekuwa akiitambulisha Tanzania kama nchi yenye amani, utulivu, rasilimali nyingi za asili, watu wakarimu na mazingira rafiki kwa biashara na uwekezaji. Huo ni uzalendo wa vitendo unaojenga taswira chanya ya nchi yetu mbele ya jicho la kimataifa.
Katika uchumi wa kisasa, hakuna mwekezaji anayesafiri maelfu ya kilomita kwa sababu tu amesoma tangazo kwenye tovuti, bali mara nyingi wanakwenda baada ya kujenga imani kupitia kwa watu wanaotangaza vizuri nchi zao na fursa zilizopo.
Vilevile, katika zama hizi za diplomasia ya uchumi, uzalendo haupimwi tena kwa maneno matamu, bali kwa uwezo wa kuifanya dunia iione Tanzania kama nchi ya fursa.
Mchango wa Nyambari hauishii kwenye uwekezaji pekee kwani sekta ya utalii nayo imeendelea kuwa sehemu muhimu ya ajenda zake katika mikutano na maonesho ya biashara nje ya nchi. Amekuwa akitumia nafasi hizo kutangaza vivutio vya utalii vilivyopo nchini, kuanzia hifadhi za taifa, maeneo ya kihistoria na vivutio vingine vya kipekee vinavyoifanya Tanzania kuwa miongoni mwa nchi zenye utajiri mkubwa wa vivutio vya utalii duniani.
Juhudi hizo za Nyambari zina umuhimu mkubwa kwa kuwa utalii ni miongoni mwa sekta zinazochangia kwa kiwango kikubwa mapato ya taifa, ajira na upatikanaji wa fedha za kigeni.
Aidha, Nyambari ameendelea kutumia safari zake za nje ya nchi kutangaza bidhaa zinazozalishwa Tanzania katika masoko ya kimataifa, hatua inayoakisi dira ya kujenga uchumi wa viwanda unaotegemea uzalishaji wa ndani na mauzo ya bidhaa nje ya nchi.
Bidhaa za Tanzania zinapopata masoko mapya nje ya nchi, uzalishaji unaongezeka, kipato cha wananchi kinaboreshwa na ushindani wa bidhaa zake katika soko la dunia unaimarika. Hiyo ni falsafa inayokwenda sambamba na azma ya kujenga uchumi shindani unaotegemea uzalishaji na biashara.
Ni muhimu pia kutambua kwamba katika zama za utandawazi, taswira ya taifa hujengwa na matendo ya wananchi wake. Kila Mtanzania anayechangia kuifungua nchi kwa wawekezaji, kuhamasisha watalii au kutangaza bidhaa za ndani, anakuwa amechangia kuongeza thamani ya jina la Tanzania katika medani za kimataifa.
Nyambari Nyangwine akiwa ziarani nje ya Tanzania
Mchango wa Nyambari unadhihirisha kuwa maendeleo ya nchi yanaweza kujengwa kupitia ubunifu, mtandao mpana wa kimataifa na utayari wa kutumia mafanikio binafsi kulinufaisha taifa.
Uthubutu wa aina hiyo unahitaji kuungwa mkono na wadau mbalimbali, zikiwemo taasisi za serikali, sekta binafsi na jamii nzima. Watu wanaotumia muda, maarifa na rasilimali zao kutangaza Tanzania wanastahili kutiwa moyo kwa kuwa wanasaidia kuongeza imani ya wawekezaji, kukuza biashara za kimataifa na kuimarisha nafasi ya Tanzania katika uchumi wa dunia.
Ndiyo maana mataifa yanayopiga hatua kwa kasi kikubwa ni yale yanayowathamini watu wanaotumia maarifa, mitandao ya kimataifa na uwezo wao binafsi kuchangia kuifungua nchi yao katika masoko mapya ya biashara, uwekezaji na utalii.
Kadiri dunia inavyozidi kuunganishwa na biashara, teknolojia na uwekezaji, Tanzania inahitaji watu wengi zaidi wenye maono kama hayo ya watu wanaoamini kuwa mafanikio ya mtu binafsi yana thamani kubwa zaidi pale yanapogeuka kuwa mafanikio ya taifa.
Hapo ndipo dhana ya uzalendo inapopata maana halisi; si katika maneno matupu, bali katika matendo yanayojenga uchumi, yanayofungua fursa na yanayoiweka Tanzania katika ramani ya mataifa yanayoheshimika duniani.
Kwa upande mwingine, Nyambari Nyangwine ameendelea kujitolea kutoa misaada ya kijamii, ikiwemo ya vitabu vya kiada na ziada pamoja na vifaa vya michezo kwa shule za msingi na sekondari katika maeneo mbalimbali nchini.
Ameendelea kuunga mkono serikali katika uboreshaji wa sekta ya elimu nchini, akiamini kwamba maendeleo ya uchumi wa kisasa hayawezi kujengwa bila uwekezaji kwenye maarifa na rasilimali watu. Naam, taifa linalowekeza katika elimu linajijengea msingi wa uchumi endelevu.
Hakika, wananchi wenye maono kama Nyambari Nyangwine wanastahili kutazamwa kama rasilimali ya kimkakati katika safari ya Tanzania kuelekea uchumi wa kipato cha juu.
Ameonesha mfano wa uongozi wa kibiashara wenye maono, uzalendo na uwajibikaji kwa taifa. Ameonesha kwamba mfanyabiashara anaweza kuwa balozi wa nchi yake, mhamasishaji wa maendeleo na daraja la maarifa linalounganisha Tanzania na dunia.
Endapo juhudi kama hizo za Nyambari zitaendelea kuungwa mkono na kuigwa na Watanzania wengine, Tanzania itaendelea kupanua wigo wa ushirikiano wa kimataifa, kuvutia uwekezaji, kukuza utalii, kuongeza masoko ya bidhaa zake na kuimarisha uchumi wake kwa manufaa ya kizazi cha sasa na vijavyo.
No comments:
Post a Comment