Kanisa AICT, Right to Play waendeleza hamasa ya elimu kwa mtoto wa kike

Viongozi wakikabidhi zawadi ya jezi kwa wanafunzi wakati wa tamasha la michezo lililoandaliwa na AICT na Right to Play katika Shule ya Msingi Nyankoni wilayani Tarime wiki iliyopita. (Picha na Sauti ya Mara)

NA GODFREY MARWA, Tarime

-----------------------------------------

Kanisa la AICT Dayosisi ya Mara na Ukerewe kwa kushirikiana na Shirika la Right to Play wameendelea na kampeni ya kuhamasisha jamii kumpatia mtoto wa kike elimu. 

Msisitizo huo ulitolewa Ijumaa iliyopita wakati wa tamasha la michezo na burudani lililoandaliwa na taasisi hizo katika Shule ya Msingi Nyankoni iliyopo  kata ya Itiryo, katika Halmashauri ya Wilaya ya Tarime (Vijijini).

Afisa Mradi kutoka AICT, Daniel Fungo alisisitiza kuwa elimu ni haki ya kila mtoto, hivyo jamii ina wajibu wa kumpeleka shule na kumlinda mtoto wa kike dhidi ya vitendo vya ukatili ukiwemo ukeketaji.

"Kila mtoto ana haki ya kupata elimu, taarifa zitolewe kwa wale wanaowanyima watoto kupata elimu, lengo letu ni kuhamasisha suala la elimu kwa mtoto wa kike," alisema Fungo. 

Afisa Mtendaji wa Kata ya Itiryo, Pendo Mushi alizishukuru taasisi hizo na kusema serikali ipo tayari kushirikiana nazo katika kukomesha vitendo ya ukatili wa kijinsia katika jamii. 

 

"Tamasha ni zuri sana, watoto wanajifunza mambo mbalimbali kupitia michezo. Mtoto wa kike mzazi akikuachisha shule kwa ajili ya ukeketaji toa taarifa - pamoja na matendo ya ukatili na changamoto ili usaidiwe na serikali kwa maendeleo endelevu.

“Mtoto wa kike akisomeshwa anaweza kuwa yeyote, usikubali kwenda kulima na kuacha masomo," alisema Pendo.

Naye Mwalimu Mkuu wa Shule ya Msingi Nyankoni, Paulo Desdery Akonay aliishauri jamii kuwekeza kwa kusomesha watoto wote bila kujali jinsia wala hali yao kwani serikali chini ya Rais Dkt Samia Suluhu Hassan imeweka mazingira rafiki na wezeshi kuhakikisha kila mtoto nchini anapata elimu bila malipo kuanzia shule za awali na msingi hadi sekondari ya juu.

UNAWEZA PIA KUSOMA:

>>Serengeti yang’ara Tuzo ya Hifadhi Bora Afrika kwa mara ya sita mfululizo >>Rais Samia ahitimisha Mbio za Mwenge kwa kuwataka Watanzania kuenzi mchango wa Mwalimu Nyerere >>MAKALA MAALUMU:Tunamuenzi Mwalimu Nyerere kwa kuwafikishia wananchi huduma ya maji, hakuna atakayeachwa >>Mwanariadha wa Kenya aweka rekodi mpya mbio za Chicago Marathon